طيب. أي نعَم قعدت ييجي أسبوع عشان أخلص أول 140 صفحة، لكن الباقي كله خلص في ساعتين بالظبط!

بإختصار، أحمد مراد بيفهم، بيشوف الغلطات اللي عملها قبل كده، ومبيكررهاش. في فيرتيجو كانت اللغة ضعيفة جدًا. والحوارات كتير. ظبّط الموضوع ده في تراب الماس.. في فيرتيجو وتراب الماس الناس إفتكرت إنه حصر نفسه في فكرة الشاب اللي بيحارب الفساد السياسي، واشتكت من كمية الهزار المبالغ فيه. هنا أحمد مراد عمَل حاجة تانية خالص بعيد عن كل ده!

رواية مُبهرة بصراحة. سعيد إن في كاتب مصري قِدِر يوصل للمرحلة دي. مرحلة كتابة رواية مُشوقّة، بجد، رواية لا تعتمد على الحبكة اللي لو عرفتها بدري شوية يبقى ضاعت عليك الرواية.. رواية تُمثّل عالم كامل، مشروح فيها الشخصيات بشكل مُتقَن ومبهر جدًا، مش زي أجاثا كريستي أو المغامرون الخمسة. لأ. عالم كامل بما تعنيه الكلمة. حاجة كده زي دان براون!

فيه برضه بعض الحاجات اللي ضايقتني، زي الفلسفة المبالغ فيها، وشرح كتير لكلمات ملهاش لازمة. لكن برضه لا تؤثر في جودة الرواية بالنسبة لي.

سعيد جدًا بالرواية وعارف إن لسه الكاتب في جعبته أكتر من كده، الشيء اللي مضايقني بقه.. إن الرواية هتتحول لفيلم سينيمائي، وبطولة كريم عبد العزيز، أعتقد إن الرواية دي بالذات لو إتحولت لفيلم هتكون فيها بعض السذاجة (بالذات في الربع الأخير منها)، شِد حيلك يا مروان حامد.