يااااااااااااااااااااه .. أخيراً !! انتهيت من الرحلة الطويلة دي ..

أنا فرحت جداً لمّا صلاح بطّل ومبقاش مدمن في النهاية .. معرفش عملها ازّاي الحقيقة دانا شخصيّاً فقدت فيه الأمل .. معقولة واحد عاش حياته كلّها مدمن في مستنقع وسط مدمنين بل وتقريباً عمل كل الحاجات الغلط في حياته ومن صغره! شايفة إن أهله يتحملوا مسؤولية كبيرة جداً للي وصلله.. لو كانوا ربوه تربية مختلفة كان زمانه بقى شخص تاني.. رغم إني أشفقت على أهالي كل المدمنين إلا إن غالبيتهم أخطأ فعلاً ومسؤول عن اللي وصل له أبناءهم .. بس أحييه على مثابرته رغم اني كنت كارهاه طول الرواية .. معقولة حد تعدي عليه كل الإشارات دي من ربنا وميتعظش؟؟

أهم حاجة تتعلّمها من الرواية.. مفيش حاجة مستحيلة على ربنا .. باب التوبة مفتوح حتى تغرغر الروح, بس انت تنوي بصدق وتعزم وربنا مش هيسيبك أبداً .. متهملش إشارات ربنا سبحانه وتعالى ليك.. صحبة الخير خير معين على الصلاح والتوبة.. لازم تغادر أرض السوء وأهلها اللي كانوا بيشجعوك على الشر سواء بمشاركتهم ليك أو سكوتهم عليك

نيجي للعيوب .. ليه الرواية طويلة كده؟ 600 صفحة كانوا ممكن يختزلوا للنص تقريباً .. مش فاهمة ليه الكاتب قعد يوصفلنا احساسهم كل مرة بيتعاطوا فيها وبيتعاطوا كام مرة في اليوم وفين وازاي ومن عند مين.. تفاصيل مملة وشايفاها سخيفة جدا وغير مفيدة ..برغم ذلك أحترم في الكاتب انه مكتبش ولا شتيمة ولا وصف خارج رغم ان غيره كان ممكن يستغل موضوع الرواية لجعلها بذيئة

الرواية مملة ومش مملة في الوقت نفسه.. يعني بتبقى عايز تخلّصها جداً وفي نفس الوقت زهقان من المطّ والإسهاب بدون أي فائدة

الكاتب مهتمش خالص بالأسلوب الأدبي وتحسينه .. كأنها مذكرات بالضبط وليست رواية ده غير ان لغة الكتابة عاميّة مخلوطة بفصحى ركيكة