يا خسارة الورق!
والله ما بتستاهل انها تنقرأ!
يعني هاد اسمه تعدي مو بس على أدب السجون، هاد تعدي على كل حدا عاش مرارة السجن بدون وجه حق..
اولا اللغة شعرية مستفزة.. والكلام فيه حكي ما إله لزوم وﻻ إله مطرح وكله عبارة عن حشو مع استعراض عضلاته الشعرية..
تانيا استخدامه الكثيف للقرآن، ما بتخليك تفهم تركيبة الشخصية، انت متدين جدا؟ انت وسطي، بس كتير مهتم بالقرآن؟ انت حدا حافظ وفاهم القرآن هالقد لدرجة تقدر تستخدمه بطريقة بديهية وضمن كلامك اليومي؟ او انك حاطط المصحف حدك وانت عم تكتب الرواية؟
تالتا دخوله على السجن ما بخليك تتعاطف معه نهائيا وﻻ للحظة وحدة، ﻷنه شخص بكامل قواه العقلية طالع على مهرجان شعري، وألقى شعر مستفز للسلطة، شو ناطر بالله؟ يصفقولك؟
يحكولك برافو أطربتنا، زيدني من الشعر بيت؟
وجاي بقلك انا فتت ع السجن لمطالبتي بالحرية!!! كيف عم تطالب بشي ضمن مجتمع نايم وجاي لوحدك تعملي حالك ناصح!
وبعدها بقلك حبسوني! ايه طبعا بدك تنحبس، والنكتة انه ما تعرض لتعذيب او اي نوع من مرمطة السجون الحقيقية!
والأهم من هاد كله في فقرة بيذكر فيها انه في 3 شباب قاعدين عم بعذبوا حالون عن طريق تجريح جلدون بشفرة.. وقعد يتفنن بالوصف بطريقة بتقلب المعدة، بالأخير بقلك ما بعرف ليه كانو عم يعملوا هيك!!!!!
انا شو استفدت من كل هالمشهد؟؟ اذا انت ما عذبوك جاي تقرفني على عماها؟ بس المهم تذكر مشهد تعذيب، وما تفهمني ليه وشو قصته؟
المهم بالمختصر رواية بتقرف من كثرة الركاكة والملل وقلة الطعمة، ما بتفوت بجو السجن نهائياً وﻻ للحظة، وحتى اللغة ما فيي امدحها ﻷنه مستخدمها بغير مكانها، ما فيك تستخدم لغة شعرية هالقد لتحكي عن سجن! انت عم تكتب تجربة واقعية حقيقية جدا، كتير عايشينها وقلبت حياتون، وﻻ تحتمل اي شعرية او تلطيف للواقع.. ﻻزم تكون واضحة شفافة صادمة تنقل اللحظة بحقيقتها بدون اي صور جمالية وغابة وأدغال والشمس الساطعة والطيور ترفرف..