خليني ابدأ الكلام بالنقطة اللي مزعلة ناس كتير جدا من الكتاب ده وهي نقطة انه بالعامية المصرية وادافع عن قرار الدكتور محمد طه في نشره بالعامية لسببين:-
أولا ان عامية الكتاب عامية مثقفين مش عامية قهاوي ومش عامية واحد لغته العربية واقعة من الدور العشرين
ثانيا الكلام اللي بيتقال في الكتاب ده لو اتقال بلغة اعلى من عامية المثقفين هايكلكع ومش هايتفهم لمعظم الناس اللي من الفئة اللي الدكتور محمد طه مستهدفها من كتابه وهي فئة عامة الشعب اللي بدأوا يفهموا اهمية الصحة النفسية وعاوزين يعرفوا عنها اكتر
ندخل بقى في المهم
الكتاب ده هو ببساطة نتاج تجارب مؤلفه الشخصية كانسان والعلمية والعملية كطبيب نفسي في موضوع العلاقات واللي بيتضمن كل العلاقات من علاقة الانسان بربنا لعلاقته بنفسه وجسمه واللي حواليه جميعا
الكتاب من وجهة نظري مهم جدا وخصوصا لأي اتنين داخلين على جواز او متجوزين فعلا وعاوزين يغيروا علاقتهم للاحسن واهم فكرة فيه طبعا واللي اي حد بيحضر محاضرات الدكتور محمد طه او جلسات العلاج النفسي الجماعي اللي هو بيديرها عارف انه بيكررها وكتير وهي فكرة الاستحقاق اللي احنا اتولدنا بيها والمجتمع اخدها مننا وحط عليها شروط
أرشح هذا الكتاب بشدة وان شاء الله هايكون موضوع الحلقة الجاية من سلسلة فيديوهات اعرف اكتر على قناة اليوتيوب بتاعتي