#سندريلا_سيكريت

#هبة_السواح

عدد صفحات الكتاب : ٢٩١

تصنيف الكتاب : محاضرات في التنمية البشرية life coaching

مدة القراءة : ١٠ ايام

الكتاب بيحكي عن سندريلا اللي اتجوزت الامير وافتكرت انها هتلاقي السعادة كلها معاه بعد ما خلصت من شر مرات ابوها اللي سببلها عقدة في حياتها لكن سندريلا بتتصدم في الامير بعد جوازها واكتشفت انها مش سعيدة مع الامير فرجعت للساحرة أشجان عشان تعلمها ازاي تبقى سعيدة.

الكتاب مقسم ل١٠ فصول كل فصل في أوله بيحكي جزء من حدوتة سندريلا وبعد كده بتدخل الكاتبة تشرح مقصودها من الحدوتة في شكل محاضرات باللغة العامية.

الكتاب من أفضل كتب التنمية البشرية اللي قرأتها واتعلمت منها وأثرت في حياتي فعلا لأنه ببساطة جامع معظم الكتب في كتاب واحد الهدف من الكتاب اننا ازاي نعيش عيشة فل او زي ما بيقول الكتاب "حياة بجودة".

وبتقسم الكاتبة علاقاتنا في الحياة إلى ٧ علاقات وهي علاقاتنا ب(ربنا - أهلنا - الزوج أو الزوجة - أولادنا - أصدقائنا - نفسنا - المجتمع) وقالت إن كل علاقة من دول بتسبب السعادة فقسمت السعادة إلى ٧ تانكات كل تانك بعلاقة منهم يعني احنا في حياتنا عندنا ٧ تانكات للسعادة لكننا لما بنفقد تانك منهم مش بنبص لباقي التانكات اللي في حياتنا ومش بنحمد ربنا علينا فبالتالي احنا ممكن نوقف حياتنا على تانك واحد منهم رغم إننا لو فقدنا واحد او اتنين ممكن نعوضه بالباقي يعني لو أنا بدأت أحس بحزن أو إني مش سعيد في علاقة معينة ليه أمحور حياتي وأوقفها حوالين العلاقة دي مانا ممكن اشوف ايه اكتر حاجة بتسعدني واعملها عشان اتجنب الحاجة اللي بتضايقني يعني لو بحب القراءة مثلا او التلوين او العمل التطوعي انا ممكن اعمل اللي بحبه عشان يبعدني عن اي حزن.

وكمان بتتكلم الكاتبة عن اننا بنتحكم في حياتنا او بنعيش طبقا لمجموعة من القيم بتشكل حياتنا وآرائنا ومعتقداتنا وإن قيم كل إنسان بتختلف عن الاخر فلازم اتعامل مع كل واحد من خلال مجموعة القيم اللي ليها أولوية عنده وبالتالي هنقدر نعيش حياة متوازنة.

أفضل فصول الكتاب هو الفصل الثالث واللي بعتبر الكتاب كله ممكن يتلخص فيه

عيوب الكتاب أولا اللغة العامية واللي بمل منها والرغي الكتير وكأن الكاتبة بتكتب محاضرة ليها متسجلة فالكتاب طويل جدا وفيه أجزاء كتير مكررة وكان ممكن يتلخص بطريقة أفضل من كده ويمكن أنا لخصته في مجموعة الاقتباسات اللي أخدتها من كل موضوع في الكتاب فكان لازم الكاتبة تفرق ما بين أسلوب الكتابة وأسلوب المحاضرة وأعتقد إن شرح الكتاب في شكل محاضرة صوتية كان تأثيره هيبقى أكتر من الكتاب

أنصح بالكتاب ده وبشدة لأنه فعلا هيأثر في كل قارئ وتقييمي له ٤ / ٥ وكان ممكن يبقى ٥ / ٥ لولا عيوبه