أزهار الموت..تاني رواية للكاتب فايز غازي بعد روايته الأولي مُناي...

الرواية تبان إنها رواية عن جريمة قتل ومحاولة البحث عن القاتل بس في رأيي لو بصينا عليها من زاوية أوسع هي رواية سياسية بإمتياز..

الكاتب إتكلم بجرأة يحسد عليها عن الكثير من الأوضاع السياسية الغلط اللي موجودة في بلاد كتير..زي الفساد،إستغلال السلطة والنفوذ..خلط الدين بالسياسة..التحرش حتي التعذيب في السجون..

الرواية بتوضح لنا إزاي مفهوم العدالة بالنسبة لرجال السلطة قابل للتحايل عليه ولإي مدي هم علي إستعداد إنهم يدوسوا علي أي حد من أجل مصالحهم الشخصية..

"في الحروب يسقط الأبرياء ضحايا ويكونون وقوداً لها تشتعل بهم وتنطفئ من أجلهم،لابد من تقديم الأضحية من أجل الخير العام!"

اللي مخليني مستغربة جداً إن الرواية تعتبر نقلة قوية جداً للكاتب بعد الرواية الأولي اللي كانت تعتبر رواية رومانسية ومكتوبة بلغة شاعرية جداً..وده إن دل علي شئ فهو دليل علي تمكن الكاتب من الكتابة في مواضيع مختلفة وبأسلوب كمان مختلف...

رواية حقيقي ممتعة ومشوقة جداً ومش حتسيبها إلا لما تخلصها بس أحلي حاجة فيها إنك مع أخر صفحة حتقعد تسأل أسئلة كتيرة ممكن تلاقي لشوية منهم إجابات جوة نفسك وجزء تاني ممكن ميكونش له إجابات في الدنيا دي!

"أي مجتمع ستبنيه وقد وصلت إلي سدّته راقصاً فوق الجثث؟!

بئس العلم والثقافة والمستقبل المبني علي الدماء..! "