اليهودي الحالي رواية للكاتب اليمني علي المقري و كانت من ضمن الروايات التي دخلت القائمة الطويلة للبوكر عام ٢٠١١..
تدور أحداث الرواية في اليمن خلال القرن السابع عشر
و من خلال قصة حب وقعت بين فتاة مسلمة وشاب يهودي تلقي الرواية الضوء علي معاناة اليهود اليمنيين ،الاضطهاد والعنصرية اللي كانوا بيتعرضوا لها في هذه الفترة من قبل المسلمين إلي أن وصل الأمر لهدم كنائسهم ،مصادرة أموالهم و فرض عليهم ضرائب ضخمة حتي تم أجلائهم وتهجيرهم من اليمن ...
موضوع الرواية مهم جداً ودايماً بحب الروايات اللي بتتكلم عن فترات وأحداث تاريخية معرفش عنها كتير وهنا في الكتاب الصراحة مكنتش أعرف عنها حاجة...
المشكلة في الرواية إن أحداثها سريعة جداً وفي قفزات في التسلسل الزمني وحسيت إنها رواية متكروتة وكانت محتاجة تُكتب بتأني أكتر من كدة وكانت أكيد حتبقي أحلي من كدة بكتير..
المشكلة مش بس إن الأحداث سريعة لكن الشخصيات كمان مش مرسومة بعناية و الحبكات مش منطقية في أجزاء كتير...
الرواية حجمها صغير و يمكن الكاتب كان عاوز يكتب رواية مختصرة ولكن في رأيي دة أضعف الرواية و كان ينقصها حاجات كتير...
التقييم نجمتين ولكن عشان كان فيها معلومات جديدة بالنسبة لي فحرفع التقييم ل٣ نجوم..