رواية جميلة أوي عيبها الوحيد إنها بتخلص بس.
أنا كنت مفكرة إن رواية ليلة ونعود دة أعلى ليفل عند مي، لكن طلع فيه ليفيلات أعلى بكتير من ال كنت متصوراها.
مش عارفه أبدأ منين ولا منين، بداية من التمهيد والوصف الجميل والتشويق الألذ، للتلاعب بالأزمان بشكل احترافي، والأدهي إني كل شخص قابلته خليتني اتعاطف معاه مرة، واتدايق منه مرة، وأنبهر بذكائه مليون مرة.
وكله كوم وسرد الجريمة كوم تاني، وكونك خليتني أحلل حاجة وفي الآخر تقلبي الموازين وتفاجئيني بحاجة تانية
لا كتير على المرء والله الشعور بهذا الكم من الإثارة والغموض والإبداع.
الأحداث متسلسلة ومن كتر الترابط هتحس بعبقرية، وفي كل سطر تقريبًا هتلاقي نفسك جوه لغز جديد.
ربط الشخصيات ببعضها كان من ضمن أكتر الحاجات ال كانت محمساني أني أكمل الرواية وأعرف دة هيعمل أي، ودة عمل كدة ليه وف الآخر بكتشف إنهم واحد أصلًا ودي شطارة من الكاتبة تُحتسَب ليها.
وآخر حاجة حبيت أنهي بيه، الكاتبة نسيت إنها بتكتب وطلعت شطارتها في مجال الصيدلة في الرواية.
ووضحت نقطة قوية إن إزاي الطب ممكن يكون علاج، وممكن تاني يستخدم في الجريمة.
وآخر مشهد في الرواية وقفت عنده لعبقرية الكاتبة في إنها تقلب الرواية رأسًا على عقب في آخر الصفحة.
وفي النهاية أنا فخورة بالكاتبة الدكتورة ميّ صالح.
وبكل تأكيد أنا مستنية جميع أعمالها الجاية.♥️