أنا مش من كبار معجبين ليو تولستوى لكنى قرأت له آنا كارنينا وكنت معجبة بالعظمة اللى انكتبت بيها لكنى ماقريتش بعدها عمل كامل ليه، قررت أقرأ مذكرات زوجته لأنى كنت عايزة أعرف شخصه عن قرب، هل هو شخص متكلف للمثالية زى ماأنا ظنيت ولا دى كانت غاية بيحاول وبيسعى ليه لكنه مش بيدعيها..

القراءة لمذكراته زوجته الحقيقة اجهدتنى نفسيا وعصبيا، أنا كنت متعاطفه معاها فى الأول لكن هو كشخص وانسان بالرغم من انسانيته بجوانب ضعفها وقوتها ردود أفعاله وطريقته فى التعامل مع شخصية الزوجة من خلال شهادتها هى الشخصية خلتنى اتحول تعاطفى معاها فى البداية لمحبة وتعاطف شخصى معاه هو بالنهاية..

المذكرات بالرغم من إن الزوجة الكونتيسة صوفيا تولستوى كتبتها علشان تشهد العالم كله على تضحياتها وصبرها ومعاناتها مع زوجها والآلم اللى بتقول انه اتسبب لها فيها هو وأبنائه والمحيطين بيه خلتنى اتحول فى النهاية للتعاطف الشخصى معاه هو والإشفاق عليه واحترامه فى النهاية..

المذكرات طويلة جدا ومنهكة عاطفيا ونفسيا لو ركزت فى قراءتها لكنها تستحق القراءة لو حبيت تشوف كاتب زى تولستوى من وجهة نظر زوجته ومن خلال أحكامها هى الشخصية عليه وعلى حياتها معاه وردود أفعاله زى ماهى أوردتها فى المذكرات.

قراءة متعبة لكنها تستحق لو حابب تعرفه عن قرب.