كتاب ممتع، ومسلي، كان صادق مع نفسه ومتسق مع فكرته وفكرة اللي كتبته واللي بتتكلم عنه
كتاب يخلص في جلستين تلاتة، لغة سهلة، وحكي سلس، لغة مبتدعيش أي حاجة، لغة بسيطة وسهلة وأقرب لبوستات الفيسبوك، لكن الكتاب استمد جودته مش من اللغة، استمدها من الوضوح والصراحة وعدم إدعاء أي شيء، ثم من الموضوع .. أحمد فؤاد نجم المثير للجدل الصاخب الشهير، المحبوب المكروه ونوارة اللي حالها ميختلفش كتير عن حال أبيها، وشراسته "اللي قلت عندها كتير ولأسباب مفهومة" وخفة دمه وتمتعه بالذكاء والنكتة والإفيه الحراق
شخصيًا معنديش تعليق على نوارة وأفكارها ومعاناتها وتلقائيتها وتعريتها التامة لأبوها وأمها، صحيح بحكم إني محافظ محبتش لقطة أو اتنين خصوصا وهي بترد على أبوها الشتيمة بس كمان ضحكت لإنه السبب في إحساسها بالضياع وإنه عيشها حياة صاخبة ومقلقة ومفقود فيها عنصر الأمان، زي ما برضه ربط اسمها بإسمه كان له أثر كبير في البريق واللمعان وفي كل شيء في حياتها اللي أشبه بفيلم سيما
المهم في الكتاب حاجتين
١. إنه نوعية كتب مسلية وممتعة ومفتقدة في مكتبتنا المعاصرة اللي انحصرت في فئات محددة
٢. إنه كتاب مهم جدًا كل أب وأم يقروه ويحطوه في بالهم وهم بيربوا أولادهم