مصاب عظيم 🥺
الله يكون فى عون اللى يتصاب به 🤲🏻
مش بس هو لوحده اللى عليه يتحمل
ده كمان كل شخص جنبه لازم يبقى عنده
قوة تحمل 💪🏻
بنفتكر أن المريض هو بس اللى بيتألم
لكن ربنا عالم بالشخص الملازم له
الجندى المجهول 🫡اللى بنحمله هو كمان فوق طاقته
ونقول لازم تستحمل 🤌🏻
طول بالك
مش بإيدى أنا موجوعة 😔
بلاش دلع أنتى قدها
مين قال أنى قدها واقدر على التحمل والطبطبة
أنا كمان محتاجة لمعاون يقدر يشدد من آذرى ويرفع شوية من معنوياتى
روايات كتير اتكلمت عن احساس المريض ووجعه وآلمه
لكن اول مرة اقرا عن إحساس الشخص الملازم للمريض
بيبقى فيه اللى مكفيه
ولازم عليه يبقى هادى ومطيع
وياخد المريض بالهداوة لعل الله يشفيه
طيب لو مرض مالوش علاج ويستلزم المتابعة ليل ونهار
تفتكر هتبقى حالته ازاى 🤷♀️
مطلوب منه يركن حياته تماما على جنب لمدة لا يعلمها إلا الله
المريض بيبقى متشعلق فيه غصب عنه ما هو كأنه ايده ورجله الاتنين
مشاعر تلغبط وتحير
ياترى أنت قد أنك تشيل حد فى مرضه
هتقدر تستحمل
ولا هتبقى مشاعرك زى " ريتا "
اللى اتشخصيت والدتها فى يوم أنها مريضة " باركنسون " وتعريفه الشلل الرعاش
مفيش منه شفاء ❤️🩹 … مجرد كام 💊 يتاخدوا يخلوها تتحسن لكام ساعة وترجع تانى لنفس الحالة 🤦🏼♀️
محتاجة مساعدة ٢٤ ساعة لأن المريض مابيبقاش عنده القدرة على التحكم فى أعضاءه … يعنى أبسط الأشياء مش هيقدر يعملها إلا بمساعدة شخصا ما..
ماتلومش على " ريتا " وتعمل زيى فى أول الرواية
وتقول ايه القسوة ديه …
اقرا الحكاية من " إيلينا " يمكن تكون عارفة اللى فيها بيقولوا دايما " قلب الأم " بس تفتكروا " إيلينا" عارفة اللى فى " ريتا " 🤷♀️
رواية تبان أنها جريمة لكن فى الحقيقة أنا شوفتها رواية انسانية بحتة تناولت احاسيس مختلفة عن العادى .. هتقف فيها كتير وهتفكر..
وده يعلمنا أننا مانحكمش على حياة حد ولا نشيل شخص فوق طاقته كل واحد فينا عنده قدرة تحمل
فيه اللى بيستحمل وياخدها تحدى وفيه اللى بينهار من أول وقعة وفيه اللى بيفضل يعافر ويقع ويقوم وربنا وحده اللى عالم و حاسس به.. فياريت ماتنظرش عليه وسيبه فى حاله ربنا يقويه ويشفى كل مريض 🤲🏻