تبتدأ احداث العمل برضا ..بنت عمرها ١٨ سنة بتتمني الزواج و من الواضح ان في ما يشغل بالها وهو احد سكان منطقتها زيزو الي بتحبه و موافقة ع فكرة زواجه بالرغم من عدم موافقة اختها بس هي مشيت بمبدأ (ظل راجل ولا ظل حيطة) و كلام دا😅
بعد كدا بننتقل لخط تاني في اسرة.. أسرة هشام و زوجته نانسي و طفلهم (ابن هشام) زين..
بيجي في يوم هشام يقول لمراته عايزين نعمل عزومة حلوة لصديق قديم له جاي يزوره
بعد الحدث دا بكام يوم بتنقلب موازين قصتنا و تسلك طريق غامض !!
ف يا تري ماذا يخبئ القدر لابطال قصتنا ؟!
⚠️ يصلح العمل لمن هم فوق الـ١٦ سنة ⚠️
السرد جاء بسيط سلس.. بصراحة حسيت من كتر ما الكاتبة بتحاول تنزل بيه اكتر بحيث يتوافق مع جميع القراء اصبح ركيك او ضعيف في (بعض) الجوانب وليس كل العمل..
الحوار كان عامية مصرية و للاسف في مشكلة هقول فيها رائي ف السلبيات
بحس ان الوصف عند الكاتبة في مشكلة في معظم الاعمال الي قرأتها لها، انه ضعيف و غير كافي، انا كقارئ بركز اوي في الحتة دي لأنها مهمة جدا لنقل أجواء العمل و تشجيع مخ القارئ ع التخيل افضل .. إذا كان وصف مكاني او شخصيات او حتي دقة و سينمائية المشاهد
شخصيات العمل.. نمطية وليس فيها جديد، وللاسف مفيش بناء او تصميم لهم بشكل يجعلهم ثلاثي الابعاد ما عدا رضا.. الي كانت موفقه في تصاعدها و تطورها مع الأحداث و بناءها التاريخي
جرعة الغموض في العمل لم تكن موفقة او لم تكن كما تخيلتها ع الاقل هنا في مشكلة كبيرة في حبكة العمل وهو تأخر حدوث الحدث الناري
لحد ٤٠ او ٤٥٪ كأني بقرأ رواية اجتماعية بحت دون تعكر صفو الاحداث بأي مثيرات خاصة بأدب الجريمة ودا شيء صعب من وجهة نظري
وكمان بيلعب في تصنيف العمل في المقام الأول، يخليه اجتماعي مش جريمة
انا معنديش مشكلة بأن الجانب الاجتماعي يبقي ظاهر و واخد حقه في الرواية البوليسية و عارف ان الكاتبة مشهورة بذلك بس مش لدرجة قرب نص الرواية.. ع الاقل من وجة نظري نبدأ بحدث مثير في الاول من نص الرواية و نفرش براحتتا
ولكن .. دا لا يمنع إطلاقا ان النهاية و الحبكة حقيقي حلوة ولم تخطر على بالي لحد اخر لحظة وان الاثارة ارتفعت في اخر كام صفحة او اخر فصلين نلاتة مثلا
عجبني كمان بداية الرواية بأحداث الشيطان و آدم و خط الانتقام كانت حلوة جدا و محمسة للأحداث
نرجع لنقطة الحوار🙃
مشكلته انه كثيف .. اوووي
وحقيقي كان في حوارات نستاهل تتحول لمشاهد او فلاش باك و كانت هتبقي افضل من كدا بكتير
اخيرا حاجة اخيرة في العمل كانت صدفة زيادة وهو الست الي بتساعدهم في البيت الي كانت كل شوية تدخل تعيط ع ابنها.. انا عارف اني كدا محنك زيادة و ان غرضها إرباك القارئ بس والله صدفة اوڤر دووز 😅😅😅😅
وأه.. الغلاف الجديدة تحفة ♥️👌
الخلاصة.. عمل جيد، محتاج تصبر عليه شوية عشان تدخل في أحداث الجريمة الي كانت جميلة و بحكبة انا شخصياً لم اتوقعها و عجبتني