"عن هاتف وثلاث جـ.ثث ليارا رضوان/ الكتابين معًا"
*بعض التجارب خوضها مؤلم أكثر من العزوف عنها!"
زي ما فيه كلام الأحسن ميتقالش، في مغامرات الأفضل متتعاشش، لأن متعتها هتكون منقوصة، بل ممكن تختفي تمامًا!
*الرجل لا يحب حتى يتخفف من همومه عند امرأته، بل يجب ليستعين بحبها ذاك في مواجهة كل ما يعترضه!*
لقب "شريك حياة" اللي بيطلقه الواحد مننا على الطرف الآخر في علاقته من الجنس المخالف ليه مجاش من فراغ، بل هو معنى حرفي للشعور الواجب تبادله بينهم.. شريك حياة!
*الحقائق تغلب الأحلام، والحب أول شيء تدهسه أقدام الواقع!*
للأسف العالم حوالينا بقى شبيه بالغابة، الأحلام فيه بتفضل أسيرة الأحلام، والحلم اللي بيتحقق في الغالب بيتقلب كابوس، والحب على طول متحاوط بالحر.ب، والبقاء للي نفسه أطول!
***************
الاقتباسات اللي فاتت علمت معايا وكانت بالنسبالي هي الرسائل المستخلصة من الرواية وعشان كده ناقشتها، أما عن رأيي في العمل ككل فمش هقدر أنكر إنه عمل بديع، في أول كام صفحة حسيته ممل، خصوصًا إني داخله أطالعه بحماس على إنه عمل بوليسي وهدور فيه على حل لغز وفوجئت بعمل اجتماعي رومانسي!
يمكن لو مكنتش قرأت المشهد المشوق اللي في البداية مكنتش كملت العمل في الوقت ده وكنت أجلته، بس أنا كنت حاطاه قدام عيني طول الوقت لحد ما بدأت الجرا.ئم تظهر، وبحيي الكاتبة على وضعه في مقدمة الكتاب الأول.
بمرور الصفحات بدأت أندمج مع العمل أكتر وأغوص في سطوره أكتر وأكتر، وبالنسبالي الكتاب التاني كان مشوق عن الأول بمراحل، لكني برجع ده لأني كنت وصلت لذروة الأحداث.
العمل سرده جميل وعنصر الغموض فيه مميز، خصوصا بعد خلطه بجزء خيالي في نهاية العمل، وده شيء خلى العمل رومانسي اجتماعي خيالي بوليسي!
الحوار كذلك كان جميل، كفاية إنه مكانش ثرثرة فارغة، وكمان النهاية جت معبرة بإسقاط مميز بيظهر إنه مهما انتصر الخير فعمر الشر ما هينتهي لحد قيام الساعة، لكن اللي مش قادرة أتجاوز ولا أتغافل عن ذكره هي الرومانسية الدافئة المبهرة اللي رسمتها الكاتبة كقصة حياة للأبطال، وجمل الغزل البديعة اللي كتبتها على لسان البطل بالفصحى السلسة، واللي قدرت تفصلني من ضغط عصبي ونفسي لا يستهان به، وحقيقي لها كل الشكر والدعم على إبداعها في الكتابين على التوالي♥️!
#خلاصتها_في_اقتباساتها.
#زينب_إسماعيل.