بتبدأ احداث العمل بتحقيق رسمي مع شخصا ما، ومع سير التحقيق بنكتشف ان وظيفته تدعي (م.ج)، وهي اختصار ((منظف جرائم))
بإختصار بطل روايتنا معروف ان دي وظيفته و رقمه الخاص بالعمل مع الخارجين عن القانون، و لما حد فيهم يرتكب جريمة بيروح ينظف المسرح و يخفي بصمات القاتل و كمان يخفي الجثة، ودا بسبب انتشار معدل الجريمة في المستقبل القريب الي بدور حواليه احداث العمل ٢٠٥٢
وفي احد مرات تنظيفه لأحد المواقع بيحصل شيء كارثي؟!
⚠️يصلح العمل لمن هم فوق ال١٦ ⚠️
طبعا يا صديقي فكرة العمل او النبذة المختصرة عنه او حتة كلمة الضهر محمسة جدا.. صح؟
وتحس انها فكرة جديدة و دا حقيقي، هي فعلا تعتبر فكرة جديدة لم اقرأ عنها من قبل ع الاقل في الادب العربي.. لكن هل الكاتب عرف يستغل انه يجيب فكرة جديدة و مثيرة زي دي ؟
للاسف .... ولا تعالي ندخل في المراجعة علطول👇
سرد العمل عربية فصحي بتلعب ما بين انها بسيطة و سلسة لركيكة في بعض الأحيان، الحوار فصحي كذلك..
الوصف.. سيء، ضعيف، مع ان العمل دا اكثر شيء كان يميزه هو الوصف
الوصف لنظرة الكاتب المستقبلية، الوصف لعمليات التنظيف، دا الي انا كنت منتظره ولم أجده كما تخيلت بصراحة، بل كان الوصف سريع و مختصر!!
الشخصيات، تعتبر شخصيات العمل دا تتمحور فقط حول (شهاب ) "المنظف"، هو الي بدور حواليه احداث العمل و التحقيق الي داخل في حبكة العمل
وبما ان الشخصية الرئيسية في الرواية هي شخصية وحيدة ف دا كان محتاج رسم و تصميم لها قوي.. وللاسف برده لم يحدث
شخصية سطحية جدا، بدون بناء تاريخي و دوافع كافية تجعله من لحم و دم
و باقي الشخصيات ممكن يكونوا ٢ فقط الي بيحركوا مجري الاحداث و طبعا برده لم يتم تصميمهم بشكل جيد
الرواية في الاول كانت محمسة جدا، و البداية حلوة بس بعد كدا احداث (بالرغم انها تبان شيقة) بس كانت مملة و متوقعة لدرجة كبيرة
خسارة كبيرة اووي ان العمل دا يطلع كدا، لأنه كان محتاج شوية مجهود و كان هيترفع رفعة تانية
لانك جبت فكرة حلوة، القاعدة حلوة
لكن بنيت بعشوائية و تسرع
بالأضافة لأعتماد احداث كتير في العمل ع الصدف الغير منطقية
النهاية كانت متوقعة، بس حلوة وفيها شيء من المفاجأة لو ملمحتهاش من الاول
واخيرا عايز اقول كلميتن قبل الخلاصة.. انا عارف ان زي ما في افلام بيطلق عليها (بوبكورني) في كمان روايات بتتعمل في المقام الاول للمتعة و الانبساط يعني مش بيكون مطلوب منها اوي انها تعقد في اللغة و تعمق في الحبكة.. تمام
و العمل دا منهم بس .. مش لدرجة الضعف الشديد في ابسط عواميد العمل
يعني مش شرط عشان تكون رواية خفيفة لذيذة انها تبقي ضعيفة و ركيكة خالص
وطبعا لازم اقول ان الغلاف حقيقي احسن من العمل ذات نفسه 😅😅
الغلاف هو السبب الاول و الوحيد في قرائتي لهذا العمل و سمعت انه الي عمله احمد مراد ف شابوه يعني
الخلاصة..
عمل لو كان اتبذل عليه شوية مجهود كمان كان ممكن ياخد الدرجة النهائية مستريح، ودا بسبب فكرته
لكن الاستستهال للاسف.. ضيعه
ومع ذلك جرب بنفسك و شوف ممكن يعجبك و تتبسط معاه وهت بالفعل في شوية متعة بالذات في الاول.. يمكن شوية المتعة دول هما السبب في النجميتن...