#سفريات2024

#أحلام_نائل_سويدان

كتير واحنا بنقرا كتب التاريخ بنبتدي نفكر ..ياترى لو حصل كذا بدل كذا كان ايه حصل؟؟؟ ولو القائد الفلاني كان انتصر ف المعركة الفلانية كان مستقبل البلد اتغير للاحسن أو الأسوأ...افتراضات وتغيير ف التاريخ ف ذهننا واحتمالات كتير ولكن تأثيرها محدود...لأنها ببساطة بتشتغل على حدث واحد بس بدون التفكير في نظرية الماندالا

ايه هيا نظرية الماندالا؟؟ ولو فعلا بقى فيه إمكانية السفر عبر الزمن وتغيير حدث بعينه دة هيكون تاثيره ايه ع المستقبل القريب ولحد آلاف السنين؟؟ طب لو دة حصل هيكون ليه؟؟ ومين المتحكم فيه؟؟؟

الكاتب بياخدنا في رواية"أحلام نائل سليمان" الصادرة عن "دار الرسم بالكلمات" ف رحلة ا نائل المربي الفاضل اللي طلع معاش، فجأة بيكون له القدرة على السفر زمنيا عشان يقابل ناس بعينها ويعمل مهمة محددة بطرق تقنية متطورة جدا...ياترى الأمور هتفضل بسيطة؟؟ دة اللي هنشوفه ف الرواية

الرواية اعتمدت على أسلوب الرواي العليم اللي بيتغير مرة واحدة بس ف الرواية كلها، سرد كان قوي ف الاول و فلاش باك بسيط على مدار الرواية

الكاتب قدر ينقل لنا فكرته مع معلومات تاريخية كتير وبعض النظريات والمعلومات النفسية، ونهاية غير متوقعة واخدت حقها فعلا رغم أنها مفتوحه

ولكن

السرد اللي بدا قوي ف الاول.. طول جدا جدا على طول الرواية، الحوار بين الشخصيات خاصة شريف ونائل كان طويل جدا جدا ومليان معلومات ونظريات علمية توهتني وحسستني بالملل...دة كان مفروض يبقى بشكل مختصر وممكن نحط هامش ب اسم النظرية والقارئ له حرية أنه يكمل قراءة أو لا..انما حصة العلوم والتاريخ دي كانت بتطول قوي

الشخصيات م اخدتش حقها ف التقديم...فجأة لقيت نفسي ف قلب الرواية و بعد كام صفحة مسافرة عبر الزمن، من كتر سيطرة نائل ع الرواية كنت بنسى أن فيه ناس تانية معاه ف الرواية...كان ممكن الدنيا تتوزع افضل من كدة

نائل بسنه دة ازاي يتحول لكتلة نشاط؟؟ نفس تعليق الصديق فداء الرسول

النهاية وان كانت مكتوبة حلو بس ف اخر ثلت كنت متوقعاها...دة للاسف معجبنيش

الرواية رغم كل دة اتميزت ب لغة قوية...عجبني منها

❞ في مرحلة من العمر، يشعر الإنسان بنوع من الغُربة عما كان يظنها حياته، يدرك في وقت من الأوقات أن حياته التي ظن أنه يعرفها جيدًا، ويحبها، لم تكن سوى طريق بدأه منذ سنوات وأجبِر على السير فيه دون وعي، ❝

❞ بعض البشر لا يمتلكون رفاهية التوقف وتقييم الأمور، لا يمتلكون رفاهية الاستسلام، أو حتى رفاهية الإحساس بالتعب!‏ ❝

❞ ‏في تلك الحياة، الجميع محاربون، لم يكن ينبغي تعريف تعبير المحارب بالمقاتل في ساحة المعارك فحسب، كان ذلك خطأ فادحًا، فمعترك الحياة ممتلئ بالساحات، يعج بالمحاربين من كل الأصناف.‏ ❝

❞ كلنا أحياء في أزماننا، أموات في زمن أحدهم! ‏ ❝

ف المجمل

رواية بدأت قوية...وكانت ممكن تطلع احسن من كدة بكتير

#قراءات_حرة

#قراءات_يناير

الكتاب رقم 1

٣٣/١