تخيل تعيش طول عمرك بتلعن الحب واللي بيحبوا بسبب انك شوفت حب عمرك في السوبر ماركت معاها عيلين

طب تخيل انك بعد ما تلعن الحب والظروف والسنين والحياة

تشوف (ليلى برهان) اللي تخلي قلبك يدق جامد أكتر من الأول وتدوب فيها من أول نظرة

طب تخيل ان اللي قلبك حبها من اول نظرة يبقي المسافة بينك وبينها مش مسافة اميال ولا كيلوهات ولا حتى سنوات ضوئية

إنما المسافة بينكم "مسافة كِرش"

الأكل الحاجة الوحيدة اللي بتحبها في حياتك وبتعملها بكل سهولة تبقي هي العقبة الوحيدة في حياتك اللي تخليك متعرفش تفوز بحبك الكبير

إدمانك للأكل يخليك شبه الكورة في رجلها تشوطك وترجعلها تاني تتنطط زي الكورة بالظبط

يخليك لو بصيت في المراية متشوفش شكلك انما تشوف قرد مشوه

يا ترى انا فعلاً القرد ده ؟

ولا ده خدعة دفاعية من مخي علشان مبطلش أكل ؟

ده اللي هنعرفه من سطور الرواية

#الوحش_القابع_في_أعماقك رواية رقم 12 من سلسلة روايات الحب والرعب الصادرة عن روايات مصرية للجيب

كالعادة سالي بتعمل السهل الممتنع

رواية رعب رومانسية ازاي معرفش

رعب نفسي رومانسي بطابع كوميدي ساخر

استمتعت بالرواية الحقيقة ومكنتش عايزها تخلص وزعلت انها خلصت بالنهاية الغريبة دي

نهايتها كانت غير متوقعة

الرواية تقييمي ليها 4نجوم ونص

اللغة سلسة ولينة بسيطة تستمتع بيها

القصة والحبكة كويسة إلا من كام نقطة صغيرة مش هينفع أقولها علشان حرق الأحداث

ومستني باقي السلسلة من دلوقتي ♥

#إسلام_بتاع_الكتب

#مش_ريفيو