النهارده خلصت أولاد حارتنا لنجيب محفوظ للمرة الثانية بنظرة مختلفة بعد مدة طويلة جدا قريتها فيها أول مره، المره دي النظرة كانت مختلفة في القراءة بشكل عام، الجدال الأكبر عن الرواية كان في وجهة نظر البعض في إنه أخطأ في تصويره لله عز وجل وحشاني أن أكون مؤيدًا لفكرة التطاول على الله لكنه لم يتطاول، هو أتكلم - وهذا ما أظن - بصوت الكثير في السؤال عن سبب الشر و ليه الشر موجود، لو أخدنا الرواية كراوية فهي بديعة في السرد واختيار الأسماء، و السهل الممتنع في وصف الأحداث من غير ملل، والفكرة الأشمل أنه في شر بس دايمًا كان فيه رسايل عشان تفكر الناس بالخير، و رسائل عن أن العلم بلا دين يؤدي للهلاك، ولو كان القارئ مُصر على إنه ياخدها في سكة غير كونها رواية فهو استخدم القصص اللي اتعلمنا منهم، قصة سيدنا آدم وخروجه من الجنة وقصص موسى وعيسى ومحمد عليهم أفضل الصلوات في أنهم بعثوا لتصحيح الخطيئة وانهم الطريق للمغفرة، وإن كان تخلى عن معجزاتهم وحول القصص إلي قصص بشرية متماشية مع طبيعة كل أتباع نبي، كنت حاسس بين السطور خوفه وإن الموضوع فعلا يحتمل التأويل لكن في النهاية وبعد أخذ رأي علماء و الأزهر قالوا إننا ناخد بالنية اللي أتكلم بيها الكاتب على إنها رواية، العبقرية كمان إن الرواية دي لو اتقرت بعد سنين كثير هنلاقى فيها نفس الرسالة، إن الحلال بيّن والحرام بيّن وإن ربنا لم يخلقنا للشقاء انما احنا إللي بنختار نعيش فيه…

غفر الله له لو أخطأ وغفر لي لو أسأت الفهم