رواية خيانة في المغرب

اول رواية تكتب بالذكاء الإصطناعي. وأنا أول حد احملها من على أبجد وأقراها إمبارح.

دار النشر كوتوبيا كتوبيا للنشر والتوزيع

أولا بجد كل الشكر للمحترم أحمد لطفي اللي بكل قوة قال دي رواية كاتبها GPT. رغم إنه كان ممكن يعمل زي البعض وياخد الفكرة ويظبطها ويقول دي فكرتي للأسف. بجد كل التقدير انه عمل فكرة زي دي

نيجي للتجربة بقى. يمكن لإن الموضوع لسة في أوله فأحب أقول إنه GPT روائي خائب .. فكرة الرواية حلوة إلى حد ما كبداية مقدرش أقول لأ.

لكن نيجي للسلبيات الأدبية .

👈اللغة ركيكة جدا . لغة عربية آه لكن فكرتني بطريقة موضوع تعبير الثانوي وإحنا بنكتبه. تكرار رهيب لبعض الكلمات.

👈 فيه سقطات في الحبكة .

👈 يعني مثلا الزمن مش راكب مع بعضه . هل هو في الزمن القديم يبقى ازاي فيه موبايلات. ولو هو في الزمن الحديث دي تبقى كارثة يعني ايه زمن حديث ولسة فيه حاوي وقرد متسلسل والناس بتبهر بيهم. ويعني ايه تاجر بصناديق في العصر الحديث.

👈 رسم الشخصيات كمان كان فيه خلل شديد. وعدم وجود اي اعتبارات لمشاعر البشر. يعني ايه واحد يوصي ابنه وصية ووفقا للي لشخصية الوالد فهو كان رحيم وكويس يجي الابن اول ما الاب يموت يكسر الوصية طب يا سيبه يستريح شوية في تربته. الخالة الشريرة دي مش شريرة دي هبلة منين إنت شريرة وعاوزة تقتلي البطل. ولما يجي حد يساعده تطرديه من بيتك عادي من غير ما تراقبيه أو من غير ما تهدديه. وايه موضوع ضربهم بالعصيان دا.

👈 يعني ايه حد يشيل سكينة من المغرب لمصر ويعدي في المطار عادي كدة. هي مصر مفيهاش سكاكين.

👈 الخالة العبيطة هو خلف ولد وانتهينا ايه لازمة انك عاوزة تجبيره يخلف أكتر .. ما ولد زي ولدين زي عشرة في الورث.

👈 مدة الحمل مش كانت تسع شهور.. عدت اكتر من عشر شهور ليه في الحمل.

👈 المكان موصفش المغرب بالعكس حسيت اني في دولة اجنبيه مش المغرب من سير حديثه وكلامه ..

👈 حتة العقود والمستندات . ليه البطل حسسني انها مكتوبة بالهيروغليفي. او هو بقى معدل ذكاؤه تحت معدل ذكاء العصفور . دا التبرير الوحيد ليا.

👈 عشر شهور بيتم تسميم البطل ومبيمتش. ليه .. دا هرقل على كدة. وليه ودته جبل ما كانت تفضل حابساه في القصر وخلاص بدل الفرهدة والتعب.

👈 طبعا فيه حاجات في رسم الشخصيات مش حينفع اقولها عشان ححرق الرواية.. اقروها انتوا بقى وحتعرفوا قصدي على ايه

كلامي مش معناه إني مستمتعش انا حبيت الفكرة والتجربة جدا جدا. بس حبيت أوضح إن فيه حاجات مينفعش الذكاء الاصطناعي يحل محل البشر بتاتا فيها.

#ريم_جمعه

#حقيقة_كتاب