#تجربتي_مع_الذكاء_الاصطناعي

#جريمة_فى_المغرب 45 صفحة

الحقيقة ان الذكاء الاصطناعي بالنسبة لى عموما شئ مخيف ومحزن .. مش لاني ضد التطور والتكنولوچي .. لكن بحس بكده وانا بشوف ازاي بيتم استبدال الانسان بالروبوت والاستغتاء عنه فى كل المجالات تقريبا ..

صحيح ده هيتأخر شوية فى بلادنا .. لكنه هيحصل هيحصل .. فببص لولادي وانا مش عارفة شكل دنيتهم ومستقبلهم هيبقي ازاي وسط التغير السريع كل يوم عن يوم ..

المهم امبارح قرأت بوست مسابقة #وهبان و #كوتوبيا وتطبيق #ابجد عن الرواية المكتوبة بالذكاء الاصطناعي وبينى وبين نفسي قولت هي وصلت لكده كمان 🫣 .. وبما اني مشتركة فى التحدي 😁 الفضول خلاني اجرب واشوف عمو جبوتة ( كما اطلق عليه الكاتب 😂 ) هيألف ازاي ؟

الحقيقة كانت تجربة سيئة جدا 🤦🏻‍♀️

القصة ماسخه مجرد رص جمل ورا بعض ورا بعض 😏

لا فيها روح ولا مشاعر ولا ابداع ولا لغة وحتى الأحداث مش راكبة على بعض ..

فكرتني ببعض الروايات العجيبة اللى بتطلع لنا كل سنة ايام معرض الكتاب وبيكون خسارة فيها تمن الحبر والورق 🫢

ختاما .. انا ضد استخدام الذكاء الاصطناعي فى التأليف والابداع والكتابة ..

لانه فاقد للمشاعر والاحساس وغير قادر على التعبير عن انسانيتنا وطبيعتنا ودوافعنا النفسية .. اللى بتشدنا وتجذبنا وتخلينا نتفاعل كقراء مع كل عمل جديد بنقرأه ... وننبهر ونسعد بامكانيات مؤلفينا المبدعين وعبقريتهم وذكائهم وقدراتهم العظيمة على استخدام اللغة باسلوب متفرد ومتميز لكل منهم ..