اسم الرواية :خيانة في المغرب

اسم الكاتب : chat GPT&احمد لطفي

دار النشر :كتوبيا للنشر والتوزيع

عدد الصفحات:49 على أبجد

التقييم:⭐ ⭐ ⭐

في البداية حابة أوضح اني اتحمست جدا لما كتوبيا أعلنت عن الرواية لأن كان عندي فضول اشوف الذكاء الاصطناعي هيكون عامل ازاي في الجزء الإبداعي لأنه منتشر جدا الفترة اللي فاتت دي في مجالات مختلفة والموضوع مقلق على اصعدة مختلفة، لكن كان جانب الكتابة دا مختلف عن أي مجال تاني لان ابعاده كتيرة ،وأعتقد دا السبب اللى خلى صناع العمل يخوضوا التجربة،والكاتب وضح اكتر من مرة سواء قبل نزول الرواية او داخل الرواية ان دا مش اتجاهه في الكتابة ولكن هي مجرد تجربة نشوف بيها الذكاء الاصطناعي ممكن يطلع لينا ايه وبجد بحي الكاتب انه قال كدا لأن حد تاني ممكن كان كتب ومقالش انه استعان بالذكاء الاصطناعي، ولكن من الصعب لأن من الواضح فى الرواية ان حتى الآن لو حد قرر يستعين بيه هيبان مش هتكون زي الرواية اللي متعودين عليها، نبدأ من اول الغلاف اللي اكيد معمول بالذكاء الاصطناعي اللي معجبنيش اوي شكل الشخصيات يخوف في تفاصيلها الصراحة عكس بعض الصور اللي جوا الكتاب كانت حلوة ومعبرة عن سياق الأحداث اللي بتوصفها.

بالنسبة للغة فحسيت انها ضعيفة بالرغم من محاولات الكاتب لتعديلها اللي باين في بعض الأجزاء.

بالنسبة للأحداث والحبكة في ثغرات كتير اكيد بس بما اني وانا بقرأ مكنتش حاطة توقعات اني هقرأ حاجة مبهرة فدا كان مقبول.

في المجمل هي تجربة مستنيرة بتعرفنا حدود الذكاء الاصطناعي وممكن نستفيد منه في ايه زي ما استاذ أيمن حويرة كان قال فى مداخلة بخصوص الرواية ودي حاجة منطقية لأن الذكاء الاصطناعي بقا امر واقع مستخدم فى العالم دلوقتي الذكاء ان احنا نوظفه صح،واكيد هنشوف قريب تاني محاولة تاتية نشوف فيها الذكاء الاصطناعي اتطور ازاي فى الكتابة ،بس يظل الكتابة جانب فى رائي ميقدرش عليه الذكاء الاصطناعي بنفس الإبداع ورسم الشخصيات والحبكة زي الإنسان.

#تجربتي_مع_الذكاء_الاصطناعي

#خيانة_في_المغرب