بما إني شكلي كدا عندي بلوك ريفيوهات فخلونا نعتبرها مجرد دردشة ...

وخلوني اعترفلكم إني شخص بقى يخاف جدا من التكنولوجيا اللي أصبحت مسيطرة على كل حاجة .. اه هي خلت حياتنا أسهل بس أسهل من غير طعم .. الاستسهال أفقدنا الكتير من الاحساس بالاستمتاع بيها...

توصل بقى لفكرة تدخلها في الابداع الأدبي ..

لااا بقى ستوب يابني هنا 😅

دي الحاجة الوحيدة اللي بنلاقي فيها منفس لينا .. احنا بقينا نتقبل القراءة الإلكترونية بالعافية واحنا حاسين بالذنب كمان بس بنقول مش مهم المهم اننا نقرأ ونتبسط...

لكن فين الانبساط والاستمتاع هنا.. بقصة مكتوبة بأونكل الذكاء الاصطناعي.. ياعم احنا كنا ناقصينك !! 😅

هو هنا _رغم تحفظي إننا نقول عليه (هو) غير العاقل دا _ كتب عن فكرة ما تم تغذيته بيها مسبقا بشكل مختصر(يعني بردو مجبش الفكرة من عنده) وتناولها من خلال عناصر العمل الأدبي (مش عارفة اذا كان عارفها اصلا) ابتكر شخصيات واحداث حاول يخليها متصلة ومعتمدة على بعضها إلى حد ما بس السرد جاء نمطي جدا وأشبه بقصص الأطفال او موضوعات التعبير المدرسية من خلال جمل اسمية وخبرية بلغة بسيطة جدا وكلمات مكررة..

أسلوب جاف جدا بدون ادني تعبير عن مشاعر الشخصيات وكأنها هي كمان روبوتات بلا مشاعر..

روبوت بلا مشاعر هيكتب عن المشاعر ازاي !!

الخوف بقى إنهم في محاولات قادمة يتطوروا الموضوع ويغذوه بمعلومات اكتر عن طبيعة النفس البشرية ومشاعرها واحاسيسها في المواقف المختلفة وبالتالي دا ينعكس على طريقة الكتابة وتبقى أقرب للكتابة البشرية !!

لو اتكلمنا عن فكرة القص نفسها فالابداع فيها بيكون في طريقة كتابتها حتى لو قصة مكررة ومتوقعة فالاستمتاع بيكون في اسلوب السرد ، في اللغة والتشبيهات والقدرة على الوصف وتحويل النص المكتوب لمشاهد مرئية ممتعة .. توصلنا مشاعر الشخصيات فنحس نفسنا مكانهم أو تعبر عننا فنحس ان الكاتب بيتكلم عننا بصورة أقرب..

الكتابة بتخلق حالة جميلة من الألفة بينا وبين الشخصيات وبينا وبين الكاتب نفسه..

ودا محصلش هنا ولا في رأيي المتواضع هيحصل مهما اتطور..

انا مع إن الإبداع الادبي فعل بشري بحت لا يمكن مهما تطور بالذكاء الاصطناعي إنه يوصل لنفس المستوى من التعبير والقدرة على الامتاع..

في ظل المادية اللي بتبتلع حياتنا اتمنى يوؤدوا بعض التجارب في بدايتها حفاظا منهم على بعض من المتبقى لنا من الاحساس بالتفرد البشري كنوع من أنواع التراث حتى 😢

بعتذر إن كانت نظرتي للتجربة سوداوية كدا ..

وكان عندي رأيي إن كان ممكن العمل يتعرض لفترة بدون مانعرف أنه بواسطة ذكاء اصطناعي يمكن دا كان يفرق في تقييمنا شوية بدون انحياز أو رفض داخلي _غصب عننا _ للفكرة كنوع من أنواع القلق المشروع على مستقبل الكتابة اللي بيهدد المتعة الأهم والأكبر لينا في الحياة..

القراءة ❤️

#تجربتي_مع_الذكاء_الإصطناعي

#خيانة_في_المغرب