ملحوظة هامة جدا⚠️⚠️⚠️⚠️

مراجعة العمل دا و السلبيات الي هذكرها من وجهة نظري الكاتب بالفعل صلحها في الأعمال الجديدة دا اول عمل للكاتب ف ياريت نراعي دا..♥️

بتبدأ احداث الرواية بشاب بيدخل شقته و يكتشف ان فيها اتنين حرامية، بعد شد و جذب واحد منهم بيطلع سكينة و يق.تل الشاب دا، بعد كدا بنشوف الصحفي أمير وهو راكب القطر و في طريقه لمحافظة المنوفية و بالأخص قرية ((شمياطس)) للتحقيق في احداث غريبة بتحصل هناك!!

ف يا تري مين الشاب الي اتقتل ف الاول و ايه علاقته بالأحداث، و هل امير هينجح في مهمته الي رايحلها وهي انه يعرف يطلع بحدث صحفي مثير، و مين جناين الي بيدور حولها علامات استفهام كتير ؟؟

و السؤال الأهم ما الذي حدث في شمياطس!!؟؟

⚠️تصلح الرواية لمن هم فوق ال١٦ سنة⚠️

انا بكدا اكون خلصت جميع اعمال الكاتب الكبير هيثم موسي و نفس الكلمة كررتها في الثلاث مراجعات ان ا هيثم راجل موهوب، و بالرغم ان دي اول اعماله و بالرغم ان في عيوب الراجل صلحها الا انه عمل يستاهل القراءة زي ما هنشوف، و طبعا دي حاجة تحتسب للكاتب جدااا انه يتطور في كل عمل عن التاني

يعني انا مثلا متوقعش ان الكاتب بتاع عمل النهاردة هو نفسه الي كتب أنتروبوفاجيا او حتي ديمنولجي..

السرد في العمل بلغة فصحي سليمة و سلسة و تصلح للأجواء العامة للرواية، الحوار جاء بالعامية المصرية و كان مظبوط و ماشي مع العمل محستش معاه بإزعاج..

وصف الشخصيات و الامكان و........ كان من جيد لجيد جدا و طبعا الكاتب وصفه اتحسن للغاية في الأعمال الجديدة، مش عايز اكرر الجملة دي كتير عشان حضراتكم متزهقوش بس كلمة الحق تتقال 😅♥️

شخصيات العمل بسيطة و قليلة لكن للاسف كانوا مسطحين، ممكن تكون جناين و ياتي بعدها أمير كويسين شوية لكن كامل، حسان حسيت ان الكاتب لم يضف لهم من البناء التاريخي و التصميم ما يجعلهم يعلقوا في ذهني كثيراً بصراحة، و برده مش عايز اكرر الجملة إيها 👆😅😅

تسلسل الاحداث و تصاعدها كان كويس.. شوية، مش هقولك هتحس بملل شديد ولكن في اوقات كنت بحس ان الرتم محتاج يشد اكتر من كدا

جرعات الرعب في العمل ممتازة، حقيقي في بعض المشاهد الي هتثير خوفك و انت بتقرأ و يا سلام لو بليل في مكان هادئ كدا..

قالب العمل في المجمل مش بيتكلم في حاجة جديدة خالص، بل بالعكس هي حاجة مهروسة، تيمة الرعب التي تنتمي للسح.ر و التعاوي.ذ و الكلام دا ...لكن... حبكة العمل صنعت إضافة عظيمة...

بالرغم و بكل صراحة اني توقعت النهاية بدري شويتين.. إلا ان الفئة الأكبر مش هتتوقعها و هتعجب بها جداا و بالربط الي هيحصل

و انا زي ما قلت فوق اني خلصت كل اعمال الكاتب هو فعلا فنان في حتة البلوت تويست دي و دا العمل الوحيد الي توقعت نهايته

ملحوظة خارج يد الكاتب، العمل يحتوي علي أخطاء لغوية كتير لدرجة الازعاج، ف دي حاجة تخص دار إبهار ياريت يخلوا بالهم منها

الخلاصة..

عمل جيد، في جرعة رعب لا يستهان بها، بسيط و هيخلص معاك بسرعة و اضمن لك حبكة في منتهي الحرافية👌